1. Mi dangte mai-ah na om ciangin lampi khak pa/nu hi
loin lampi hon sak pa/nu na hih ding hanciam in.
2. Gualzawhna pen a hun leh a mun cihte tungah kinga lo
hi. Na nasepna peuhah midangte etteh tak ding le mite
muan theih ding dong a na hanciam tawntung nak leh
gualzawh na in hong taisan ngei lo ding hi.
3. Tuahsia lawmlawm sing ee ci-in guallel kisa-in na om
kha hiam? Tuahsia na kisakna, guallel na kisaknate
tungtawn pan na ngah khak thu theihnate pen na mai lam a
dingin gual zawhna hi gige hi. Lungkia het loin, haksatnate
phu velvel lel in.
4. Mite' hong gensiat hong nehpik ding lau kha het kei in.
Nang lungsim singtho lam nang leh nang na kitel nak leh
nasep ding zom toto lel in. Na lampi tungah hong hawk
lawklawk ui khempeuh na buaipih khak leh na ngim na
tupna tung zo lo ding hi teh.
5. Gu nei ganhing, Kii nei ganhing gilote leh a sia a pha
ngaihsut gina mel nei lo mihingte tawh kigam lat sawm in.
Tuate pawl in, na khitui luanna ding bek piang sak lel ding
uh hi.
6. Mi duhhop huaiham lua, thu khat peuh a um baih
pahpah, mi hehpih lua baih kha pahpah cihte pawl na hih
khak leh kidawm in. Tua bang mite pen leitungah khem a
tuak mun pente a hi uh hi.
7. Na ngim, na tup bangin hong pian loh sim in, na-ut
peuhin om gawp kha kei in. Mihing a na pian khiat
nungsang, manpha tak mahin nuntak siam ding hanciam
kikkik in.
8. Na nuntakna meivak a tangsak na hih nop leh piak
khiatna hanciam in. Ngahna ah lungdamna a om sam hang
in, piakkhiatna ah lungdamna pen sawt vei kimang zawin
lungnopna kician piang sak hi.
9. Nang nopsak na ding bek tawh midangte khitui luang sak
kha het kei in. A hoih loh lam thei gegu napi, tawmvei
nopsak na ding lunggulh manin na khat peuh nasep giap
khak leh khantawn guh natna lungzinna suak kha thei ding
hi. Kidawm in.
10. Na maitai sak in, nuih mai le cin Gualzawhna ding,
Lungdamna dingin kahlei khat hong suak kha ding hi. Na
dah hun, na lungkham hun nangawnin kimaitai sak zo na hih
leh mi picing taktak na hi ding hi.
"Lungkham sinkhamna, thusia lasiate tungah kinga kha
ken, Pasian hong piak thu theih siamna, ngaihsut siamnate
na nuntak na ki-uk sak den in."
